ሕብረተሰብና ሓቂ፣ ሓላፍነትን ክብርን ተመርኲሱ ክዛረብ ከሎ፡ ጽኑዕን ሓያልን ይኸውን። ግን ገለ ውልቀ-ሰባት ብፍላይ ኣብ ጾታዊ ፍልልይ ዝዓለመ ኣሉታዊ ወፍሪ ማሕበራዊ-ሜድያ ፥ ህዝባዊ መድረኻት ተጠቒሞም ጎዳኢ ክስታት፣ ጸርፊ፣ ጌጋ ሓበሬታ፣ ምፍርራሕ፣ ወይ ማሕበራዊ ክብሪ ሕብረተሰብና ዝፈላልይ ቃላት ከስፋሕፍሑ ከለዉ፡ ብዙሓት ንጹሃት ሰባት ይጉድኡ።

​

ኣብ ውሽጢ ማሕበረሰብ ተዛረብቲ ትግርኛ፡ ሓላፍነታዊ ኣዘራርባን ሕጋዊ ተሓታትነትን ንምድንፋዕ፡ ነዚ ወፍሪ ንጅምር ኣለና።

​

እዚ ወፍሪ ናይ ሕነ-ምፍዳይ፣ ጽልኢ፣ ወይ ውልቃዊ መጥቃዕቲ ኣይኮነን። እዚ ወፍሪ ናይ ክብሪ፣ ሓቂ፣ መርትዖን ፍትሕን እዩ።

​

ኩሉ ሰብ ሓሳቡ ናይ ምግላጽ መሰል ከም ዘለዎ ንኣምን። ግን ዋላ ሓደ ሰብ፡ ስምን ክብርን ካልእ ሰብ ናይ ምጥፋእ፣ ሰላም ማሕበረሰብ ዝዘርግ ናይ ምፍርራሕ፣ ወይ ጎዳኢ ክስታት ብዘይ ሓላፍነት ናይ ምስፍሕፋሕ መሰል የብሉን።

​​​

ብመንገዲ እዚ ወፍሪ፡ ንቕሓት ከነዐቢ ኢና፣ ኣብ ዝግባእ ግዜ ብሰነድ ዝተደገፈ መርትዖ ክንእክብ ኢና፣ ዝተጎድኡ ሰባት ክንድግፍ ኢና፣ ከምኡውን ህዝባዊ መግለጺታት ብሕጊ ክሕተትሉ ዝኽእሉ እንተኾይኖም፡ ሞያዊ ሕጋዊ ምኽሪ ክንደሊ ኢና።